ईद-ए-मिलादुन्नबी निमित्त बोपोडीत वृक्षारोपण

पुणे जिल्हा साऊंड, लाईट, जनरेटर ओनर्स असोसिएशनची मागणी; सर्व सण-उत्सवांसाठी वर्षभर एकच नियम लागू करा

पुणे : दहीहंडी, गणेशोत्सव आणि डीजे हा विषय सध्या तापलेला आहे. अशातच 'आम्ही प्रशासनाने घातलेले सगळे नियम पाळायला तयार आहोत; पण साउंड सिस्टीमवर बंदी घालून किंवा निर्बंध लादून आमच्यावर उपासमारीची वेळ आणू नका', असे आवाहन पुणे जिल्हा साऊंड, लाईट, जनरेटर ओनर्स असोसिएशनने केले आहे. नवी पेठेतील पत्रकार भवन येथे घेण्यात आलेल्या पत्रकार परिषदेत असोसिएशनचे अध्यक्ष गणेश काळभोर, उपाध्यक्ष सागर सुतार, कार्याध्यक्ष ओंकार पडवळ, सल्लागार मोहित पालेशा आणि रिपब्लिकन परिवर्तन पँथरचे गजेंद्र प्रकाश मोरे उपस्थित होते.

साऊंड सिस्टीमवर पूर्णपणे बंदी न घालता शासनाने निश्चित केलेल्या ध्वनीमर्यादा, वेळेचे नियम व न्यायालयीन मार्गदर्शक तत्त्वांचे पालन करुन गणेशोत्सव साजरा करण्यास परवानगी द्यावी, तसेच एक नियमावली तयार करून ती वर्षभर सर्व सण, उत्सव, कार्यक्रमासाठी लागू करावी, अशी मागणीही यावेळी करण्यात आली. आम्ही यावर्षी अशाच मंडळांकडून बुकिंग घेतले आहे, ज्यांनी आवाज वाढवायला सांगणार नाही, असे लेखी दिले आहे. मात्र दहीहंडीपर्यंत आमच्याविरोधात जाणारे नियम लागू केले, तर मात्र आम्हाला महाराष्ट्रभरातून मोर्चा काढावा लागेल, असा इशाराही असोसिएशनच्या वतीने देण्यात आला.

गणेश काळभोर म्हणाले, "प्लास्मा, साऊंडच्या भिंती, दोन मंडळांमध्ये समोरासमोर आल्यावर होणारी स्पर्धा यांमुळे गणेशोत्सव दरम्यान डीजेचा आवाज प्रमाणाबाहेर वाढतो. याचा सामान्य नागरिक, लहान मुले, ज्येष्ठ नागरिक, रुग्णांना त्रास होतो हे आम्हालाही मान्य आहे. त्यासाठी आम्ही न्यायालयाच्या नियमांमध्ये साऊंड सिस्टिम चालवणार आहोत. मात्र उत्सवादरम्यान साऊंड पूर्णपणे बंद करणे हा आमच्या व्यवसायिकांवर अन्याय आहे. या व्यवसायावर आधारित उपजीविका असणारे हजारो लोक पुण्यात आहेत, त्या सगळ्यांची कुटुंबे त्यांच्यावर अवलंबून आहेत. व्यावसायिकांचा दरवर्षी २० ते २५ लाखांचा आर्थिक व्यवहार होत होता. परंतु यंदा २५-५० हजार रुपये मिळणेही अवघड झाले आहे.

"दहीहंडी, गणेशोत्सव हाच वर्षभरातील आमचा मुख्य व्यवसायाचा कालावधी असतो. साऊंड सिस्टिमसाठी केवळ चार टॉप आणि चार बेस हा निर्णय आम्हाला मान्य आहे. लेझर लाईट, प्रेशर मेडला घातलेली बंदी, आम्हाला मान्य आहे. कर्णकर्कश्श आवाज बंद करण्यासही आमचे समर्थन आहे. उत्सव हा सगळ्यांचा असून मिरवणुकीतील साउंड सिस्टिमवरील बंदी आणि निर्बंधांबाबत प्रशासनाने पुनर्विचार करावा अशी मागणी आम्ही करतो. अशाप्रकारे व्यावसायिकांची गळचेपी केल्यास साऊंड आणि डीजेच्या समर्थनासाठी पुण्यात गणेश मंडळ कार्यकर्त्यांना सोबत घेऊन मोर्चा काढला जाईल," असे गजेंद्र मोरे म्हणाले.

सागर सुतार म्हणाले, "साऊंडचा व्यवसाय हा आम्ही जोडधंदा म्हणून करतो. पण अशाप्रकारे आमचा रोजगार हिरावून घेतला जात आहे. आपल्या राज्यातील साउंड सिस्टिमला कमी मागणी असून इतर राज्यातील साउंड सिस्टिमची मागणी मोठ्या प्रमाणात वाढली आहे. त्यामुळे स्थानिक रोजगारावर विपरीत परिणाम होत आहे. गणेश मंडळांनी महाराष्ट्र सोडून इतर राज्यातून साऊंड सिस्टिम मागवू नये, अशी आमची विनंती आहे. यंदा मिरवणुकीत अश्लील गाणी न वाजवण्याचा निर्णय आम्ही घेतला आहे. डिजे बंदीमुळे प्रशासन दरवर्षी नियमात बदल करते आणि आम्हाला आर्थिक नुकसानीला सामोरे जावे लागते. त्यामुळे एकदाच याबाबत प्रशासनाने नियमावली करावी."